1Ch 12 | NdeIBE | STEP | La ngamabutho ayeloDavida eZikhilagi, ngesikhathi engavunyelwa ukubonakala kuSawuli indodana kaKhishi (kwakungamaqhawe ayemhlomulele empini;

1 Chronicles 12

Amabutho Alandela UDavida Egangeni

1 La ngamabutho ayeloDavida eZikhilagi, ngesikhathi engavunyelwa ukubonakala kuSawuli indodana kaKhishi (kwakungamaqhawe ayemhlomulele empini;

2 ayehlome ngemitshoko bezingcitshi ekutshokeni lokutshaya ngezavutha loba bejikijela ngesokudla loba ngesenxele; babeyizihlobo zikaSawuli bengabesizwe sikaBhenjamini):

3 U-Ahiyezeri induna yabo loJowashi amadodana kaShemaha owaseGibheya; loJeziyeli loPhelethi amadodana ka-Azimavethi; loBherakha, loJehu um-Anathothi, 4 kanye lo-Ishimaya umGibheyoni, indoda eyayilamandla amakhulu kwabangamatshumi amathathu, engumkhokheli wabangamatshumi amathathu, loJeremiya, loJahaziyeli, loJohanani, loJozabhadi umGederathi, 5 lo-Eluzayi, loJerimothi, loBheyaliya, loShemariya kanye loShefathiya umHarufi,

6 lo-Elikhana, lo-Ishiya, lo-Azareli, loJowezeri loJashobheyamu amaKhora;

7 kanye loJowela loZebhadiya amadodana kaJerohamu waseGedori.

8 Abanye abakoGadi babalekela kuDavida enqabeni yakhe enkangala. Babe ngamabutho alezibindi, belungele ukulwa njalo bekwazi ukuphatha ihawu lomkhonto. Ubuso babo babuyibuso bezilwane, njalo belesiqubu njengamagogo ezintabeni.

9 U-Ezeri wayeyinduna, u-Obhadiya engumsekeli womlawuli, u-Eliyabi engowesithathu,

10 uMishimana engowesine, uJeremiya engowesihlanu,

11 u-Athayi engowesithupha, u-Eliyeli engowesikhombisa,

12 uJohanani engowesificamibili, u-Elizabhadi engowesificamunye,

13 uJeremiya engumsekeli wetshumi kanye loMakhabanayi owayengowetshumi lanye.

14 Amadoda akoGadi ayengabalawuli bamabutho, kuthi omncinyane wabo wayengamelana labalikhulu kodwa omkhulu wabo engamelana labayinkulungwane. 15 Yiwo la amadoda achapha uJodani ngenyanga yakuqala umfula ugcwele uphuphuma emakhunjini awo wonke, yibo njalo abaxotsha bonke ababehlala ezihotsheni, empumalanga kanye lasentshonalanga.

16 Amanye amadoda akoBhenjamini lamanye ayevela koJuda lawo alandela uDavida khonale enqabeni yakhe. 17 UDavida waphuma ukuba ayewahlangabeza wathi kuwo: “Nxa lingilandela ngokuthula, lizongiphathisa njengabangane, ngizimisele ukuhlanganyela kanye lani. Kodwa nxa lidinga ukunginikela ezitheni zami, mina ngimsulwa, uNkulunkulu wabokhokho kakubone lokho, alijezise.”

18 Ngakho uMoya wasesehlela ku-Amasayi, umlawuli wabangamatshumi amaThathu, wathi: “Singabakho thina, wena Davida! Sikanye lawe wena ndodana kaJese! Impumelelo, impumelelo kuwe, njalo impumelelo kulabo abaphathisana lawe! Ngoba uNkulunkulu wakho uzakusiza.” Ngakho uDavida wabamukela wabenza abakhokheli bamaviyo amabutho ayehlasela.

19 Amanye amadoda akoManase abalekela kuDavida ekuhambeni kwakhe lamaFilisti esiyahlasela uSawuli. (Yena kanye lamabutho akhe kasazange ancedise amaFilisti, ngoba ngemva kokubuzisisana, ababusi bawo bathi kaxotshwe. Bathi bona: “Uyingozi kithi, ngoba angasiphendukela abuyele enkosini yakhe uSawuli.”) 20 UDavida wathi esiya eZikhilagi, nanka amadoda abaleka koManase amlandela: ngu-Adina, loJozabhadi, loJediyayeli, loMikhayeli, loJozabhadi, lo-Elihu kanye loZilethayi ababengabalawuli benkulungwane koManase. 21 Bancedisa uDavida ekulweni lamaviyo abahlaseli, ngoba bonke babengamabutho alezibindi, njalo basebengabalawuli phakathi kwamabutho akhe. 22 Izinsuku zonke, ukusa kwamalanga, kwakutheleka abantu bezoncedisa uDavida, waze waba lebutho elikhulu, njengebutho likaNkulunkulu.

Abanye Balandela uDavida e-Hebhroni

23 Nanka amanani amadoda ayehlomele impi eza kuDavida eHebhroni ezomncedisa ukuthatha umbuso kaSawuli, njengokutsho kukaJehova:

24 amadoda ayevela koJuda – ehlome ngamahawu lemikhonto ayezi-6,800 ehlomele ukulwa impi;

25 abakaSimiyoni, amabutho ayelungele ukuhlasela beyizi-7,100

26 amadodana akoLevi eyizi-4,600, 27 kubalwa loJehoyada, umkhokheli wabendlu ka-Aroni yena owayelezi-3,700 28 kanye loZadoki, ibutho elaliseselijaha lilesibindi, lilezikhulu zendlu yakwabo ezingamatshumi amabili lambili;

29 amadoda akoBhenjamini, abakibo kaSawuli beyizi-3,000 abanengi babo kuyilabo ababesele bethembekile kuSawuli kuze kufike lesisikhathi;

30 amadoda ako-Efrayimi, amadoda ayelezibindi, edumile ezizwaneni zawo, eyizi-20,800

31 amadoda ayevela kungxenye yesizwana sikaManase, bekhethwe ngamabizo abo ukuba beze bazobeka uDavida ukuba abeyinkosi, babeyizi-18,000;

32 amadoda ayevela ko-Isakhari, ayezwisisa umumo waleso sikhathi njalo esazi ukuthi u-Israyeli kumele enzeni. Kwakuyizinduna ezingamakhulu amabili, kanye lezihlobo zazo ezazingaphansi kwazo;

33 amadoda ayevela koZebhuluni, amabutho ayezingwazi empini ngezikhali zemihlobo etshiyeneyo, eza ukuzancedisa uDavida ngokuzinikela okungalakuthandabuza, eyizi-50,000;

34 amadoda ayevela koNafthali kwakuyizikhulu eziyinkulungwane eyodwa, kanye lamadoda ayephethe amahawu lemikhonto ayizi-37,000;

35 amadoda ayevela koDani, ezimisele ukulwa empini, eyizi-28,600;

36 amadoda ayevela ko-Asheri, amabutho ayevele ekwejayele ukulwa empini njalo ezimisele ukulwa, ayeyizi-40,000;

37 njalo ngempumalanga yeJodani, amadoda akoRubheni, koGadi lakungxenye yesizwana sikaManase, ababehlome ngemihlobohlobo yezikhali, babeyizi-120,000.

38 Bonke laba babengamabutho azinikeleyo ukungena laloba yisiphi isigaba. Ngamabutho aya eHebhroni ezimisele ukufika abeke uDavida esihlalweni sobukhosi abe yinkosi ka-Israyeli jikelezi. Abanye bonke abako-Israyeli babengqondonye befisa ukwethesa uDavida ubukhosi. 39 Wonke lamadoda athatha izinsuku ezintathu eloDavida, esidla njalo enatha, njengoba izimuli zawo zaziwalungisele umphako. 40 Konke labomakhelwane babo, ababevela kude khonale kubo-Isakhari, kuboZebhuluni lakuboNafthali beza bethwele ukudla ngabobabhemi, amakamela, izimbongolo langezinkabi. Kwakulefulawa enengi, amakhekhe omkhiwane, amakhekhe erezini, iwayini, amafutha, izinkomo lezimvu, ngoba kwakulokujabula ko-Israyeli.